ਚੰਡੀਗੜ੍ਹ: ਅੱਜ ਵਿਸ਼ਵ ਬ੍ਰੇਨ ਟਿਊਮਰ ਦਿਵਸ (World Brain Tumor Day) ਮਨਾਇਆ ਜਾ ਰਿਹਾ ਹੈ। ਬ੍ਰੇਨ ਟਿਊਮਰ ਇੱਕ ਗੰਭੀਰ ਅਤੇ ਖ਼ਤਰਨਾਕ ਬਿਮਾਰੀ ਹੈ, ਪਰ ਸਮੇਂ ਸਿਰ ਇਸ ਦੀ ਪਛਾਣ ਅਤੇ ਇਲਾਜ ਮਰੀਜ਼ ਦੀ ਜਾਨ ਬਚਾ ਸਕਦਾ ਹੈ। ਇਹ ਗੱਲ ਪੀਜੀਆਈ ਦੇ ਐਂਡੋਸਕੋਪੀ ਨਿਊਰੋਸਰਜਨ, ਡਾ. ਢੰਡਾਪਾਨੀ ਐੱਸਐੱਸ ਨੇ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਦੱਸੀ।
ਡਾ. ਢੰਡਾਪਾਨੀ ਨੇ ਦੱਸਿਆ ਕਿ ਪੀਜੀਆਈ ਚੰਡੀਗੜ੍ਹ ਵਿੱਚ ਹਰ ਰੋਜ਼ 8 ਤੋਂ 10 ਬ੍ਰੇਨ ਟਿਊਮਰ ਦੇ ਮਰੀਜ਼ਾਂ ਦੀ ਸਰਜਰੀ ਕੀਤੀ ਜਾਂਦੀ ਹੈ। ਇਸ ਮੈਡੀਕਲ ਇੰਸਟੀਚਿਊਟ ਦੀ ਖਾਸ ਬਾਤ ਇਹ ਹੈ ਕਿ ਇੱਥੇ 15 ਮਹੀਨੇ ਦੀ ਇੱਕ ਬੱਚੀ ਦੀ ਬ੍ਰੇਨ ਟਿਊਮਰ ਸਰਜਰੀ ਵੀ ਸਫਲਤਾਪੂਰਵਕ ਕੀਤੀ ਗਈ ਹੈ। ਸਾਲ 2021 ਵਿੱਚ ਪੀਜੀਆਈ ਦੇ ਐਡਵਾਂਸਡ ਨਿਊਰੋਸਾਇੰਸ ਵਿਭਾਗ ਨੇ ਇਸ ਕਿਸਮ ਦੇ ਸਰਜਰੀ ਦੇ ਇਤਿਹਾਸਕ ਮਾਮਲੇ ਨੂੰ ਅੰਜਾਮ ਦਿੱਤਾ ਸੀ।
ਡਾ. ਢੰਡਾਪਾਨੀ ਨੇ ਬ੍ਰੇਨ ਟਿਊਮਰ ਦੀ ਗਰੇਡਿੰਗ ਬਾਰੇ ਦੱਸਿਆ। ਇਹ ਹਾਈ ਗਰੇਡ (ਵੱਡੇ ਅਤੇ ਘਾਤਕ) ਅਤੇ ਲੋਅ ਗਰੇਡ (ਛੋਟੇ ਅਤੇ ਘੱਟ ਘਾਤਕ) ਵਿੱਚ ਵੰਡਿਆ ਜਾਂਦਾ ਹੈ। ਘੱਟ ਗਰੇਡ ਟਿਊਮਰਾਂ ਦਾ ਇਲਾਜ ਆਮ ਤੌਰ ਤੇ ਇਕੋ ਵਾਰ ਸਰਜਰੀ ਨਾਲ ਕੀਤਾ ਜਾਂਦਾ ਹੈ ਅਤੇ ਇਸ ਤੋਂ ਬਾਅਦ ਕੀਮੋਥੈਰੇਪੀ ਜਾਂ ਟੀਕਿਆਂ ਨਾਲ ਰੋਕਥਾਮ ਕੀਤੀ ਜਾਂਦੀ ਹੈ। ਇਸ ਤਰੀਕੇ ਨਾਲ, ਮਰੀਜ਼ ਆਮ ਜੀਵਨ ਜੀ ਸਕਦਾ ਹੈ।
ਦੂਜੇ ਪਾਸੇ, ਹਾਈ ਗਰੇਡ ਟਿਊਮਰ ਜ਼ਿਆਦਾ ਖ਼ਤਰਨਾਕ ਹੁੰਦਾ ਹੈ, ਜਿਸਨੂੰ ਕਈ ਵਾਰ ਕੈਂਸਰ ਵੀ ਕਿਹਾ ਜਾਂਦਾ ਹੈ। ਇਨ੍ਹਾਂ ਮਾਮਲਿਆਂ ਵਿੱਚ ਲੰਬਾ ਇਲਾਜ ਅਤੇ ਸਰਜਰੀ ਦੀ ਲੋੜ ਹੁੰਦੀ ਹੈ। ਮਰੀਜ਼ ਆਯੂਸ਼ਮਾਨ ਭਾਰਤ ਕਾਰਡ ਅਤੇ ਹਿਮਕੇਅਰ ਕਾਰਡ ਦੇ ਤਹਿਤ ਮੁਫਤ ਇਲਾਜ ਲੈ ਸਕਦੇ ਹਨ।
ਪੀਜੀਆਈ ਵਿਚ ਸਸਤਾ ਇਲਾਜ
ਡਾ. ਢੰਡਾਪਾਨੀ ਦੇ ਅਨੁਸਾਰ, ਪੀਜੀਆਈ ਵਿੱਚ ਮਰੀਜ਼ਾਂ ਨੂੰ ਪ੍ਰਾਈਵੇਟ ਹਸਪਤਾਲਾਂ ਦੇ ਮੁਕਾਬਲੇ ਕਾਫੀ ਸਸਤਾ ਇਲਾਜ ਮਿਲਦਾ ਹੈ। ਇੱਥੇ ਰੇਡੀਓ ਸਰਜਰੀ ਦੀ ਵੀ ਵਿਵਸਥਾ ਹੈ, ਜਿਸ ਵਿੱਚ ਸਰਵਾਈਕਲ ਟਿਊਮਰ ਦਾ ਇਲਾਜ ਰੇਡੀਏਸ਼ਨ ਦੀ ਮਦਦ ਨਾਲ ਕੀਤਾ ਜਾਂਦਾ ਹੈ। ਇਹ ਸਹੂਲਤ ਸਿਰਫ਼ ਦਿੱਲੀ, ਮੁੰਬਈ, ਚੇਨਈ ਅਤੇ ਬੈਂਗਲੁਰੂ ਵਰਗੇ ਵੱਡੇ ਹਸਪਤਾਲਾਂ ਵਿੱਚ ਉਪਲੱਬਧ ਹੈ। ਪੀਜੀਆਈ ਵਿੱਚ ਰੇਡੀਓ ਸਰਜਰੀ ਦਾ ਖਰਚਾ ਲਗਭਗ 75 ਹਜ਼ਾਰ ਰੁਪਏ ਹੈ, ਜਦਕਿ ਪ੍ਰਾਈਵੇਟ ਹਸਪਤਾਲਾਂ ਵਿੱਚ ਇਹ 2 ਤੋਂ 3 ਲੱਖ ਰੁਪਏ ਤੱਕ ਹੋ ਸਕਦਾ ਹੈ।
ਸਰਜਰੀ ਲਈ ਨਵੀਂ ਤਕਨੀਕ
ਪੀਜੀਆਈ ਵਿੱਚ ਬ੍ਰੇਨ ਟਿਊਮਰ ਦੀ ਸਰਜਰੀ ਲਈ ਔਰਬਿਟਲ ਰਿਮ ਸਪੇਅਰਿੰਗ ਅਤੇ ਸਿੰਗਲ-ਪੀਸ ਫਰੰਟੋ-ਔਰਬਿਟਲ ਤਕਨੀਕ ਵਰਤੀ ਜਾਂਦੀ ਹੈ। ਹਾਈ ਗਰੇਡ ਟਿਊਮਰਾਂ ਲਈ ਐਂਡੋਸਕੋਪੀ ਸਰਜਰੀ ਕੀਤੀ ਜਾਂਦੀ ਹੈ। ਡਾ. ਢੰਡਾਪਾਨੀ ਦੇ ਅਨੁਸਾਰ, ਨਵੀਂ ਤਕਨੀਕਾਂ ਦੇ ਆਉਣ ਨਾਲ ਬੱਚਿਆਂ ਅਤੇ ਵੱਡਿਆਂ ਦੋਹਾਂ ਦੀ ਸਰਜਰੀ ਸੁਰੱਖਿਅਤ ਅਤੇ ਪ੍ਰਭਾਵਸ਼ਾਲੀ ਬਣੀ ਹੈ।
ਵੱਖਰਾ ਐਡਵਾਂਸਡ ਨਿਊਰੋਸਾਇੰਸ ਸੈਂਟਰ
ਬ੍ਰੇਨ ਟਿਊਮਰ ਦੇ ਮਰੀਜ਼ਾਂ ਦੇ ਇਲਾਜ ਲਈ ਪੀਜੀਆਈ ਵਿੱਚ ਇੱਕ ਵੱਖਰਾ ਐਡਵਾਂਸਡ ਨਿਊਰੋਸਾਇੰਸ ਸੈਂਟਰ ਬਣਾਇਆ ਜਾ ਰਿਹਾ ਹੈ। ਇਹ ਸੈਂਟਰ ਅਗਲੇ ਸਾਲ ਤੋਂ ਚੱਲੂ ਹੋਵੇਗਾ, ਜਿੱਥੇ ਬ੍ਰੇਨ ਟਿਊਮਰ ਮਰੀਜ਼ਾਂ ਦੀ ਸੰਪੂਰਨ ਦੇਖਭਾਲ, ਇਲਾਜ ਅਤੇ ਸਰਜਰੀ ਕੀਤੀ ਜਾਵੇਗੀ।
ਸਾਰੀ ਉਮਰ ਦੀ ਫਾਲੋ-ਅਪ
ਡਾ. ਢੰਡਾਪਾਨੀ ਨੇ ਦੱਸਿਆ ਕਿ ਰੇਡੀਓ ਸਰਜਰੀ ਤੋਂ ਬਾਅਦ ਮਰੀਜ਼ ਇੱਕ ਮਹੀਨੇ ਹਸਪਤਾਲ ਵਿੱਚ ਰਹਿੰਦੇ ਹਨ, ਜਦਕਿ ਕੀਮੋਥੈਰੇਪੀ ਵਾਲੇ ਮਰੀਜ਼ ਦੋ ਤੋਂ ਤਿੰਨ ਮਹੀਨੇ ਹਸਪਤਾਲ ਵਿੱਚ ਰਹਿੰਦੇ ਹਨ। ਸਰਜਰੀ ਤੋਂ ਬਾਅਦ, ਮਰੀਜ਼ ਦੀ ਸਾਰੀ ਉਮਰ ਫਾਲੋ-ਅਪ ਜਾਰੀ ਰਹਿੰਦੀ ਹੈ।
ਬ੍ਰੇਨ ਟਿਊਮਰ ਦੇ ਸ਼ੁਰੂਆਤੀ ਲੱਛਣ
- ਲਗਾਤਾਰ ਸਿਰਦਰਦ ਅਤੇ ਚੱਕਰ ਆਉਣਾ, ਕਈ ਵਾਰ ਉਲਟੀਆਂ ਵੀ
- ਨਜ਼ਰ ਕਮਜ਼ੋਰ ਹੋਣਾ ਅਤੇ ਸੁਣਨ ਵਿੱਚ ਸਮੱਸਿਆ
- ਬੋਲਣ ਜਾਂ ਸਮਝਣ ਵਿੱਚ ਮੁਸ਼ਕਲ
- ਸਿਰ ਵਿੱਚ ਹਲਕਾ ਦਰਦ ਜੋ ਸਮੇਂ ਦੇ ਨਾਲ ਵੱਧਦਾ ਹੈ
- ਬਾਹਾਂ ਅਤੇ ਲੱਤਾਂ ਵਿੱਚ ਕਮਜ਼ੋਰੀ
- ਅਚਾਨਕ ਮੂਡ ਵਿੱਚ ਤਬਦੀਲੀ
- ਲਿਖਣ ਜਾਂ ਪੜ੍ਹਨ ਵਿੱਚ ਮੁਸ਼ਕਲ
ਡਾ. ਢੰਡਾਪਾਨੀ ਦਾ ਮੰਨਣਾ ਹੈ ਕਿ ਜੇ ਮਰੀਜ਼ ਆਪਣੀਆਂ ਸ਼ੁਰੂਆਤੀ ਚਿੰਨ੍ਹਾਂ ਨੂੰ ਸਮਝੇ ਅਤੇ ਸਮੇਂ ਸਿਰ ਡਾਕਟਰੀ ਸਲਾਹ ਲਵੇ, ਤਾਂ ਬ੍ਰੇਨ ਟਿਊਮਰ ਦਾ ਇਲਾਜ ਸਫਲਤਾ ਨਾਲ ਕੀਤਾ ਜਾ ਸਕਦਾ ਹੈ।