ਭਾਰਤੀ ਫੌਜ ‘ਚ ਤਾਇਨਾਤ ਮਾਨਸਾ ਜ਼ਿਲ੍ਹੇ ਦੇ ਪਿੰਡ ਤਾਮਕੋਟ ਦੇ ਰਹਿਣ ਵਾਲੇ ਰਾਜਵੀਰ ਸਿੰਘ ਦੀ ਅਸਾਮ ਦੇ ਡਿਬਰੂਗੜ੍ਹ ਵਿਖੇ ਡਿਊਟੀ ਦੌਰਾਨ ਦਿਲ ਦਾ ਦੌਰਾ ਪੈਣ ਕਾਰਨ ਮੌਤ ਹੋ ਗਈ। ਰਾਜਵੀਰ ਸਿੰਘ ਨੇ 2017 ਵਿੱਚ ਬੰਗਾਲ ਇੰਜੀਨੀਅਰਿੰਗ ਰੈਜੀਮੈਂਟ ‘ਚ ਭਰਤੀ ਹੋ ਕੇ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ‘ਚ ਸੇਵਾ ਨਿਭਾਈ। ਉਨ੍ਹਾਂ ਦੀ ਮੌਤ ਦੀ ਸੁਚਨਾ ਪਰਿਵਾਰ ਨੂੰ ਕੱਲ੍ਹ ਮਿਲੀ।ਅੱਜ ਉਨ੍ਹਾਂ ਦੀ ਦੇਹ ਨੂੰ ਮਾਨਸਾ ਦੇ ਸਿਵਲ ਹਸਪਤਾਲ ਲਿਆਂਦਾ ਗਿਆ, ਜਿੱਥੇ ਪੋਸਟਮਾਰਟਮ ਤੋਂ ਬਾਅਦ ਲਾਸ਼ ਨੂੰ ਪਿੰਡ ਤਾਮਕੋਟ ਲਿਆਂਦਾ ਗਿਆ। ਪਿੰਡ ‘ਚ ਲੋਕਾਂ ਵੱਲੋਂ “ਸ਼ਹੀਦ ਰਾਜਵੀਰ ਸਿੰਘ ਅਮਰ ਰਹੇ” ਦੇ ਨਾਅਰੇ ਲਗਾਏ ਗਏ। ਰਾਜਵੀਰ ਪਿੱਛੇ ਆਪਣੀ ਪਤਨੀ ਅਤੇ 3 ਸਾਲ ਦੀ ਧੀ ਛੱਡ ਗਏ ਹਨ।

ਅੰਤਿਮ ਸੰਸਕਾਰ ਦੌਰਾਨ ਭਾਰਤੀ ਫੌਜ ਵੱਲੋਂ ਸ਼ਹੀਦ ਨੂੰ ਗਾਰਡ ਆਫ਼ ਆਨਰ ਦੇ ਕੇ ਸ਼ਰਧਾਂਜਲੀ ਦਿੱਤੀ ਗਈ। ਪਤਨੀ, ਮਾਤਾ-ਪਿਤਾ ਨੇ ਉਨ੍ਹਾਂ ਨੂੰ ਫੁੱਲਾਂ ਅਤੇ ਕਰੀਮ ਭੇਟ ਕਰਕੇ ਅਲਵਿਦਾ ਕਿਹਾ। ਰਾਜਵੀਰ ਸਿੰਘ ਦਾ ਅੰਤਿਮ ਸੰਸਕਾਰ ਉਨ੍ਹਾਂ ਦੇ ਛੋਟੇ ਭਰਾ ਨੇ ਕੀਤਾ, ਜੋ ਕਿ ਆਪ ਵੀ ਭਾਰਤੀ ਫੌਜ ‘ਚ ਸੇਵਾ ਕਰ ਰਹੇ ਹਨ।ਇਸ ਮੌਕੇ ਸਾਬਕਾ ਫੌਜੀ, ਮਾਨਸਾ ਦੇ ਵਿਧਾਇਕ, ਐਸ.ਡੀ.ਐਮ. ਅਤੇ ਹੋਰ ਜ਼ਿਲ੍ਹਾ ਅਧਿਕਾਰੀ ਵੀ ਹਾਜ਼ਰ ਸਨ।