ਭਾਜਪਾ ਆਗੂ ਤਜਿੰਦਰ ਪਾਲ ਸਿੰਘ ਬੱਗਾ ਨੇ ਇੱਕ ਵਾਰ ਫਿਰ ਰਾਹੁਲ ਗਾਂਧੀ ‘ਤੇ ਨਿਸ਼ਾਨਾ ਵਿੰਨ੍ਹਿਆ ਹੈ। ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਅਤੇ ਮੌਜੂਦਾ ਸੰਸਦ ਮੈਂਬਰ ਰਾਹੁਲ ਗਾਂਧੀ ਦੀ ਅਗਵਾਈ ‘ਚ ‘ਭਾਰਤ ਜੋੜੋ ਯਾਤਰਾ’ ਦੌਰਾਨ ਹਾਲ ਹੀ ‘ਚ ਇਕ ਬੱਚੇ ਨੂੰ ਧੋਤੀ ਪਹਿਨੀ ਦੇਖਿਆ ਗਿਆ। ਉਸ ਨੇ ਕਮੀਜ਼ ਵੀ ਨਹੀਂ ਪਾਈ ਹੋਈ ਸੀ। ਬੱਗਾ ਨੇ ਰਾਹੁਲ ਗਾਂਧੀ ਵੱਲੋਂ ਠੰਢ ਵਿੱਚ ਬਿਨਾਂ ਕਮੀਜ਼ ਵਾਲੇ ਬੱਚੇ ਨਾਲ ਘੁੰਮਣ ’ਤੇ ਨਾਰਾਜ਼ਗੀ ਜਤਾਈ ਹੈ। ਬੱਗਾ ਨੇ ਇਕ ਫੋਟੋ ਸ਼ੇਅਰ ਕੀਤੀ, ਉਸ ਤਸਵੀਰ ‘ਚ ਦੇਖਿਆ ਜਾ ਸਕਦਾ ਹੈ ਕਿ ਬੱਚੇ ਨੇ ਸਿਰਫ ਧੋਤੀ ਅਤੇ ਜਨੇਊ ਪਾਇਆ ਹੋਇਆ ਹੈ।
ਬੱਗਾ ਨੇ ਬੱਚੇ ਦੇ ਨਾਲ ਰਾਹੁਲ ਗਾਂਧੀ ਦੀ ਇੱਕ ਫੋਟੋ ਟਵੀਟ ਕੀਤੀ ਅਤੇ ਲਿਖਿਆ, “4 ਡਿਗਰੀ ਤਾਪਮਾਨ ਵਿੱਚ, ਸਿਰਫ ਇੱਕ ਬੇਸ਼ਰਮ ਵਿਅਕਤੀ ਹੀ ਬੱਚੇ ਨੂੰ ਸਿਆਸਤ ਲਈ ਕੱਪੜੇ ਤੋਂ ਬਿਨਾਂ ਘੁਮਾ ਸਕਦਾ ਹੈ।” ਰਾਹੁਲ ਗਾਂਧੀ ਦੀ ਇਸ ਤਸਵੀਰ ਦੀ ਕਈ ਲੋਕ ਆਲੋਚਨਾ ਕਰ ਰਹੇ ਹਨ।
ਚਾਂਦਨੀ ਪ੍ਰੀਤੀ ਵਿਜੇ ਕੁਮਾਰ ਸ਼ਾਹ, ਇੱਕ ਵਕੀਲ, ਨੇ ਵੀ ਰਾਹੁਲ ਗਾਂਧੀ ਦੀ ਠੰਡੇ ਹਾਲਾਤ ਵਿੱਚ ਬਿਨਾਂ ਕਮੀਜ਼ ਜਾਂ ਟੀ-ਸ਼ਰਟ ਦੇ ਇੱਕ ਬੱਚੇ ਨਾਲ ਘੁੰਮਣ ਲਈ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਨੇ ਰਾਸ਼ਟਰੀ ਬਾਲ ਅਧਿਕਾਰ ਸੁਰੱਖਿਆ ਕਮਿਸ਼ਨ ਨੂੰ ਪੱਤਰ ਲਿਖਿਆ ਹੈ। ਉਨ੍ਹਾਂ ਨੇ ਇਹ ਪੱਤਰ NCPCR ਦੇ ਮੁਖੀ ਪ੍ਰਿਅੰਕ ਕਾਨੂੰਗੋ ਨੂੰ ਲਿਖਿਆ ਹੈ।
ਪੱਤਰ ਵਿੱਚ ਲਿਖਿਆ ਗਿਆ ਹੈ ਕਿ ਸਿਆਸੀ ਲਾਹਾ ਲੈਣ ਲਈ ਬੱਚੇ ਦੇ ਅਧਿਕਾਰਾਂ ਅਤੇ ਭਲਾਈ ਦੀ ਉਲੰਘਣਾ ਕਰਨ ਵਾਲੀ ਕਾਂਗਰਸ ਦੇ ਗੈਰ-ਸੰਵਿਧਾਨਕ ਵਿਹਾਰ ਦਾ ਨੋਟਿਸ ਲੈਂਦਿਆਂ ਕਾਰਵਾਈ ਕੀਤੀ ਜਾਵੇ। ਉਨ੍ਹਾਂ ਨੇ ਕਾਂਗਰਸ ‘ਤੇ ਬੱਚਿਆਂ ਨੂੰ ਸਿਆਸੀ ਲਾਭ ਲਈ ਵਰਤਣ ਦਾ ਦੋਸ਼ ਲਾਇਆ ਅਤੇ ਹਿੰਦੂ ਧਰਮ ਵਿਚ ਬਹੁਤ ਧਾਰਮਿਕ ਮਹੱਤਤਾ ਰੱਖਣ ਵਾਲੇ ਜਨੇਊ ਨੂੰ ਲੈ ਕੇ ਵੱਡੀ ਪੁਰਾਣੀ ਪਾਰਟੀ ਦੀ ਆਲੋਚਨਾ ਵੀ ਕੀਤੀ।
ਦੱਸ ਦੇਈਏ ਕਿ ਕੜਾਕੇ ਦੀ ਠੰਢ ਵਿੱਚ ਵੀ ਰਾਹੁਲ ਗਾਂਧੀ ਚਿੱਟੇ ਰੰਗ ਦੀ ਟੀ-ਸ਼ਰਟ ਪਹਿਨੇ ਨਜ਼ਰ ਆ ਰਹੇ ਹਨ। ਇਸ ਦੀ ਸਿਆਸੀ ਹਲਕਿਆਂ ਵਿੱਚ ਚਰਚਾ ਹੋ ਰਹੀ ਹੈ। ਰਾਹੁਲ ਦੇ ਕੱਪੜਿਆਂ ਨੂੰ ਲੈ ਕੇ ਬਿਆਨ ਸਾਹਮਣੇ ਆ ਰਹੇ ਹਨ। ਰਾਹੁਲ ਨੇ ਕਿਹਾ ਹੈ ਕਿ ਹਰ ਕੋਈ ਉਸ ਦੇ ਪਹਿਰਾਵੇ ਨੂੰ ਉਜਾਗਰ ਕਰ ਰਿਹਾ ਹੈ ਪਰ ਫਟੇ ਕੱਪੜਿਆਂ ਵਿਚ ਉਸ ਦੇ ਨਾਲ ਘੁੰਮ ਰਹੇ ਗਰੀਬ ਕਿਸਾਨਾਂ ਅਤੇ ਮਜ਼ਦੂਰਾਂ ਵੱਲ ਕੋਈ ਧਿਆਨ ਨਹੀਂ ਦੇ ਰਿਹਾ।