ਚੰਡੀਗੜ੍ਹ : ਸ੍ਰੀ ਗੁਰੂ ਤੇਗ ਬਹਾਦਰ ਜੀ ਦੀ 350 ਸਾਲਾ ਸ਼ਹੀਦੀ ਸ਼ਤਾਬਦੀ ਨੂੰ ਸਮਰਪਿਤ ਸੈਮੀਨਾਰ ਦਾ ਮਸਲਾ ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਵਿੱਚ ਇੱਕ ਵੱਡੇ ਵਿਵਾਦ ਦਾ ਰੂਪ ਧਾਰ ਗਿਆ ਹੈ। ਸਿੱਖ ਸੰਗਠਨ ਅਤੇ ਵਿਦਿਆਰਥੀ ਜਥੇਬੰਦੀ ਵੱਲੋਂ ਯੂਨੀਵਰਸਿਟੀ ਪ੍ਰਸ਼ਾਸਨ ‘ਤੇ ਪੱਖਪਾਤ ਦਾ ਗੰਭੀਰ ਦੋਸ਼ ਲਗਾਇਆ ਗਿਆ ਹੈ।
ਯੂਨੀਵਰਸਿਟੀ ਵੱਲੋਂ ਸੈਮੀਨਾਰ ਲਈ ਹਾਲ ਮੌਹੱਈਆ ਨਾ ਕਰਵਾਉਣ ਕਾਰਨ ਜਥੇਬੰਦੀ ਨੂੰ ਖੁੱਲ੍ਹੇ ਆਸਮਾਨ ਹੇਠ ਸਮਾਗਮ ਕਰਨਾ ਪਿਆ, ਜਿਸਨੇ ਇਹ ਮਸਲਾ ਹੋਰ ਗੰਭੀਰ ਬਣਾ ਦਿੱਤਾ ਹੈ।
ਵਿਦਿਆਰਥੀ ਜਥੇਬੰਦੀ ਦਾ ਦੋਸ਼ : ਸਿੱਖ ਆਵਾਜ਼ ਨੂੰ ਦਬਾਉਣ ਦੀ ਕੋਸ਼ਿਸ਼
ਸੱਥ ਪਾਰਟੀ ਅਤੇ ਪੀਯੂ ਕੈਂਪਸ ਸਟੂਡੈਂਟਸ ਕੌਂਸਲ ਦੇ ਉਪ-ਪ੍ਰਧਾਨ ਅਸ਼ਮੀਤ ਸਿੰਘ ਨੇ ਇੱਕ ਵੀਡੀਓ ਰਾਹੀਂ ਦਾਅਵਾ ਕੀਤਾ ਕਿ ਯੂਨੀਵਰਸਿਟੀ ਨੇ ਜਾਣ-ਬੁੱਝ ਕੇ ਇਜਾਜ਼ਤ ਰੱਦ ਕੀਤੀ ਹੈ।
ਉਸਦੇ ਅਨੁਸਾਰ
• ਸੈਮੀਨਾਰ ਲਈ ਸੱਦੇ ਵੰਡੇ ਜਾ ਚੁੱਕੇ ਸਨ
• ਸਟੂਡੈਂਟ ਸੈਂਟਰ ਨੂੰ ਸਥਾਨ ਵਜੋਂ ਤੈਅ ਕੀਤਾ ਗਿਆ ਸੀ
• ਬੁਲਾਏ ਗਏ ਬੋਲਣ ਵਾਲਿਆਂ ਵਿੱਚ ਸਿੱਖ ਵਿਚਾਰਕ ਅਜਮੇਰ ਸਿੰਘ ਅਤੇ ਮਨੁੱਖੀ ਅਧਿਕਾਰ ਕਾਰਕੁਨ ਜਸਵੰਤ ਸਿੰਘ ਖਾਲੜਾ ਦੇ ਭਰਾ ਅਮਰਜੀਤ ਸਿੰਘ ਖਾਲੜਾ ਸ਼ਾਮਲ ਸਨ
ਅਸ਼ਮੀਤ ਦੇ ਅਨੁਸਾਰ, “RSS ਦੇ ਦਬਾਅ” ਕਰਕੇ ਇਸ ਸਮਾਗਮ ਨੂੰ ਰੋਕਿਆ ਗਿਆ। ਉਸਨੇ ਇਹ ਵੀ ਦਾਅਵਾ ਕੀਤਾ ਕਿ ਜਦੋਂ ਉਸਨੇ ਆਪਣੇ ਅਧਿਕਾਰਤ ਕਮਰੇ ਵਿੱਚ ਜਸਵੰਤ ਸਿੰਘ ਖਾਲੜਾ ਦੀ ਤਸਵੀਰ ਲਗਾਈ, ਉਸਨੂੰ ਪ੍ਰਸ਼ਾਸਨ ਵੱਲੋਂ ਤੰਗ ਕੀਤਾ ਗਿਆ।
ਪੀਯੂ ਪ੍ਰਸ਼ਾਸਨ ਦੀ ਵਜਾਹ :ਜ਼ਰੂਰੀ ਦਸਤਾਵੇਜ਼ ਨਾ ਦਿੱਤੇ ਗਏ
ਦੂਜੇ ਪਾਸੇ, ਡੀਨ ਵਿਦਿਆਰਥੀ ਭਲਾਈ (DSW) ਅਮਿਤ ਚੌਹਾਨ ਨੇ ਦੋਸ਼ਾਂ ਦਾ ਖੰਡਨ ਕਰਦਿਆਂ ਕਿਹਾ ਕਿ ਵਿਦਿਆਰਥੀਆਂ ਨੇ ਗੋਲਡਨ ਜੂਬਲੀ ਹਾਲ ਲਈ ਇਜਾਜ਼ਤ ਮੰਗੀ ਸੀ ਜੋ ਇੱਕ ਧਾਰਮਿਕ ਸਮਾਗਮ ਲਈ ਸੀ।
ਉਹਨਾਂ ਅਨੁਸਾਰ
• ਯੂਨੀਵਰਸਿਟੀ ਦੇ ਨਿਯਮਾਂ ਅਨੁਸਾਰ ਧਾਰਮਿਕ ਪ੍ਰਕਿਰਤੀ ਦੇ ਸਮਾਗਮ ਲਈ ਵਕਤਾਵਾਂ ਦੀ ਪ੍ਰੋਫਾਈਲ ਅਤੇ ਸੰਬੰਧਿਤ ਦਸਤਾਵੇਜ਼ ਜ਼ਰੂਰੀ ਹੁੰਦੇ ਹਨ
• ਵਿਦਿਆਰਥੀਆਂ ਨੇ ਸਮੇਂ ਸਿਰ ਦਸਤਾਵੇਜ਼ ਮੁਹੱਈਆ ਨਹੀਂ ਕਰਵਾਏ
• ਧਾਰਮਿਕ ਨਿਸ਼ਪੱਖਤਾ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਬਿਨਾਂ ਪੱਕੇ ਕਾਗਜ਼ਾਤਾਂ ਦੇ ਸਥਾਨ ਨਹੀਂ ਦਿੱਤਾ ਜਾ ਸਕਦਾ
ਚੌਹਾਨ ਨੇ ਸਾਫ ਕੀਤਾ ਕਿ ਇਹ ਕਿਸੇ ਵੀ ਧਰਮ ਜਾਂ ਵਾਰਿਸ਼ੀ ਦਾਅਵੇ ਖ਼ਿਲਾਫ਼ ਕਾਰਵਾਈ ਨਹੀਂ, ਸਗੋਂ ਨਿਯਮਾਂ ਅਨੁਸਾਰ ਫੈਸਲਾ ਹੈ।
ਵਿਵਾਦ ਨੇ ਜਗਾਈ ਚਰਚਾ : ਅਕਾਦਮਿਕ ਅਜ਼ਾਦੀ ਯਾ ਪ੍ਰਸ਼ਾਸਕੀ ਕੜਾਈ?
ਇਸ ਕੇਸ ਨੇ ਕਈ ਸਵਾਲ ਖੜ੍ਹੇ ਕਰ ਦਿੱਤੇ ਹਨ:
• ਕੀ ਯੂਨੀਵਰਸਿਟੀ ਵਿੱਚ ਧਾਰਮਿਕ ਅਤੇ ਇਤਿਹਾਸਕ ਸਮਾਗਮਾਂ ਵਿੱਚ ਰੁਕਾਵਟ ਠੀਕ?
• ਸਿੱਖ ਇਤਿਹਾਸ ਨਾਲ ਸੰਬੰਧਿਤ ਵਿਚਾਰਧਾਰਾ ਨੂੰ ਦਰਕਿਨਾਰ ਕੀਤਾ ਜਾ ਰਿਹਾ ਹੈ?
• ਪ੍ਰਸ਼ਾਸਨ ਨਿਯਮਾਂ ਦਾ ਹਵਾਲਾ ਦੇ ਰਿਹਾ ਜਾਂ ਦਬਾਅ ਦਾ ਨਤੀਜਾ ਹੈ?
ਖੁੱਲ੍ਹੇ ਆਸਮਾਨ ਹੇਠ ਵੀ ਜਾਰੀ ਰਹੇਗੀ ਸ਼ਹੀਦੀ ਯਾਦ
ਯੂਨੀਵਰਸਿਟੀ ਵੱਲੋਂ ਇਨਕਾਰ ਦੇ ਬਾਵਜੂਦ ਸਿੱਖ ਜਥੇਬੰਦੀਆਂ ਨੇ ਨਿਸਚਿਤ ਕੀਤਾ ਹੈ ਕਿ ਸੈਮੀਨਾਰ ਖੁੱਲ੍ਹੇ ਮੈਦਾਨ ਵਿੱਚ ਕਰਵਾਇਆ ਜਾਵੇਗਾ ਅਤੇ ਸ੍ਰੀ ਗੁਰੂ ਤੇਗ ਬਹਾਦਰ ਜੀ ਦੇ ਬਲਿਦਾਨ ਬਾਰੇ ਵਿਦਿਆਰਥੀਆਂ ਨੂੰ ਜਾਣੂ ਕਰਵਾਉਣ ਦੀ ਕੋਸ਼ਿਸ਼ ਜਾਰੀ ਰਹੇਗੀ।
ਅਗਲਾ ਪੜਾਅ?
ਜਥੇਬੰਦੀ ਨੇ ਇਸ਼ਾਰਾ ਕੀਤਾ ਹੈ ਕਿ ਜੇ ਭਵਿੱਖ ਵਿੱਚ ਐਸਾ ਭੇਦਭਾਵ ਜਾਰੀ ਰਿਹਾ ਤਾਂ ਵੱਡਾ ਰੋਸ ਪ੍ਰਦਰਸ਼ਨ ਕੀਤਾ ਜਾਵੇਗਾ।