ਚੰਡੀਗੜ੍ਹ : ਵਾਹਨ ਚਾਲਕਾਂ ਲਈ ਇਕ ਵੱਡੀ ਰਾਹਤ ਭਰੀ ਖ਼ਬਰ ਸਾਹਮਣੇ ਆਈ ਹੈ। ਹੁਣ ਚੰਡੀਗੜ੍ਹ ਪੁਲਸ ਸਿਰਫ਼ ਉਸੇ ਹਾਲਤ ਵਿੱਚ ਹੀ ਗੱਡੀਆਂ ਨੂੰ ਰੋਕੇਗੀ ਜਦੋਂ ਕੋਈ ਡਰਾਈਵਰ ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ ਕਰੇਗਾ। ਜੇਕਰ ਵਾਹਨ ਚਾਲਕ ਪੂਰੀ ਤਰ੍ਹਾਂ ਨਿਯਮਾਂ ਦੀ ਪਾਲਣਾ ਕਰ ਰਿਹਾ ਹੈ ਅਤੇ ਉਸ ਕੋਲ ਸਾਰੇ ਦਸਤਾਵੇਜ਼ ਮੌਜੂਦ ਹਨ ਤਾਂ ਬਿਨਾਂ ਕਾਰਨ ਉਸਨੂੰ ਨਾ ਰੋਕਿਆ ਜਾਵੇਗਾ ਅਤੇ ਨਾ ਹੀ ਪੁੱਛਗਿੱਛ ਹੋਵੇਗੀ।
ਚੰਡੀਗੜ੍ਹ ਦੇ ਡਾਇਰੈਕਟਰ ਜਨਰਲ ਆਫ ਪੁਲਸ (ਡੀ. ਜੀ. ਪੀ.) ਡਾ. ਸਾਗਰ ਪ੍ਰੀਤ ਹੁੱਡਾ ਨੇ ਖ਼ਾਸ ਨਿਰਦੇਸ਼ ਜਾਰੀ ਕਰਦੇ ਹੋਏ ਕਿਹਾ ਹੈ ਕਿ ਖ਼ਾਸ ਕਰਕੇ ਜਦੋਂ ਗੱਡੀ ਵਿੱਚ ਪਰਿਵਾਰ ਹੋਵੇ ਤਾਂ ਉਸਨੂੰ ਬਿਨਾਂ ਵਜ੍ਹਾ ਰੋਕਣ ਤੋਂ ਬਚਿਆ ਜਾਵੇ। ਇਹ ਕਦਮ ਇਸ ਲਈ ਲਿਆ ਗਿਆ ਹੈ ਕਿਉਂਕਿ ਪਿਛਲੇ ਕੁਝ ਸਮੇਂ ਦੌਰਾਨ ਸੋਸ਼ਲ ਮੀਡੀਆ ’ਤੇ ਚੰਡੀਗੜ੍ਹ ਪੁਲਸ ਬਾਰੇ ਲੋਕਾਂ ਵਿਚ ਨਾਰਾਜ਼ਗੀ ਵੱਧ ਰਹੀ ਸੀ। ਕਈ ਵੀਡੀਓਜ਼ ਵਾਇਰਲ ਹੋਏ ਜਿੱਥੇ ਲੋਕਾਂ ਨੇ ਪੁਲਸ ਦੁਆਰਾ ਕੀਤੇ ਜਾ ਰਹੇ ਬਿਨਾਂ ਕਾਰਨ ਚਲਾਨਾਂ ਅਤੇ ਰੋਕ-ਟੋਕ ’ਤੇ ਸਵਾਲ ਉਠਾਏ।
ਪਤਾ ਲੱਗਾ ਹੈ ਕਿ ਪੁਲਸ ਵੱਲੋਂ ਸ਼ਾਮ ਦੇ ਸਮੇਂ ਹਰ ਥਾਣੇ ਦੇ ਇਲਾਕੇ ਵਿੱਚ 2 ਤੋਂ 3 ਨਾਕੇ ਲਗਾਏ ਜਾਂਦੇ ਹਨ। ਇਹ ਨਾਕੇ ਲੋਕਾਂ ਦੀ ਸੁਰੱਖਿਆ ਅਤੇ ਅਪਰਾਧ ਰੋਕਣ ਲਈ ਲਗਾਏ ਜਾਂਦੇ ਹਨ। ਪਰ ਅਕਸਰ ਇਨ੍ਹਾਂ ਨਾਕਿਆਂ ’ਤੇ ਪੁਲਸ ਕਰਮਚਾਰੀ ਛੋਟੀਆਂ-ਮੋਟੀਆਂ ਗਲਤੀਆਂ ਦਾ ਬਹਾਨਾ ਬਣਾ ਕੇ ਜਾਂ ਕਈ ਵਾਰ ਬਿਨਾਂ ਕਾਰਨ ਹੀ ਡਰਾਈਵਰਾਂ ਦੇ ਚਲਾਨ ਕੱਟਣ ਲੱਗ ਪੈਂਦੇ ਸਨ। ਹੁਣ ਸੀਨੀਅਰ ਅਧਿਕਾਰੀਆਂ ਨੇ ਇਸ ’ਤੇ ਸਖ਼ਤੀ ਦਿਖਾਉਂਦਿਆਂ ਸਪੱਸ਼ਟ ਹਦਾਇਤਾਂ ਦਿੱਤੀਆਂ ਹਨ ਕਿ ਜੇਕਰ ਵਾਹਨ ਚਾਲਕ ਨੇ ਕੋਈ ਟ੍ਰੈਫਿਕ ਵਾਇਲੇਸ਼ਨ ਨਹੀਂ ਕੀਤੀ, ਤਾਂ ਉਸਨੂੰ ਰੋਕਿਆ ਨਹੀਂ ਜਾਵੇਗਾ।
ਡਰਾਈਵਰਾਂ ਦੀਆਂ ਸ਼ਿਕਾਇਤਾਂ ਵੀ ਇਸ ਫ਼ੈਸਲੇ ਦੀ ਇੱਕ ਵੱਡੀ ਵਜ੍ਹਾ ਬਣੀਆਂ। ਕਈ ਵਾਹਨ ਚਾਲਕਾਂ ਨੇ ਦੱਸਿਆ ਕਿ ਜਦੋਂ ਉਨ੍ਹਾਂ ਕੋਲ ਸਾਰੇ ਕਾਗਜ਼ਾਤ ਹੁੰਦੇ ਹਨ ਅਤੇ ਕੋਈ ਨਿਯਮ ਤੋੜਿਆ ਨਹੀਂ ਹੁੰਦਾ, ਫਿਰ ਵੀ ਪੁਲਸ ਨਾਕਿਆਂ ’ਤੇ ਉਨ੍ਹਾਂ ਨੂੰ ਰੋਕ ਕੇ ਪੁੱਛਗਿੱਛ ਕਰਦੀ ਹੈ। ਇਸ ਦੌਰਾਨ ਡਰਾਈਵਰ ਅਕਸਰ ਮੋਬਾਈਲ ਨਾਲ ਵੀਡੀਓ ਬਣਾਉਂਦੇ ਹਨ ਅਤੇ ਉਹ ਵੀਡੀਓ ਸੋਸ਼ਲ ਮੀਡੀਆ ’ਤੇ ਅਪਲੋਡ ਕਰਦੇ ਹਨ। ਇਹ ਵੀਡੀਓਜ਼ ਚੰਡੀਗੜ੍ਹ ਪੁਲਸ ਦੀ ਛਵੀ ’ਤੇ ਨਕਾਰਾਤਮਕ ਅਸਰ ਪਾਉਂਦੀਆਂ ਹਨ, ਜਿਸ ਕਾਰਨ ਹੁਣ ਪੁਲਸ ਮੁਖੀ ਨੇ ਨਵੀਆਂ ਹਦਾਇਤਾਂ ਜਾਰੀ ਕੀਤੀਆਂ ਹਨ।
ਨਵੀਆਂ ਗਾਈਡਲਾਈਨਾਂ ਮੁਤਾਬਕ, ਚੰਡੀਗੜ੍ਹ ਪੁਲਸ ਮੈਨੂਅਲ ਚਲਾਨ ਪ੍ਰਣਾਲੀ ਨੂੰ ਵੀ ਹੌਲੀ-ਹੌਲੀ ਖਤਮ ਕਰੇਗੀ। ਭਵਿੱਖ ਵਿੱਚ ਸਾਰੇ ਚਲਾਨ ਸਿਰਫ਼ ਇਲੈਕਟ੍ਰਾਨਿਕ ਤਰੀਕੇ ਨਾਲ ਹੀ ਕੀਤੇ ਜਾਣਗੇ ਤਾਂ ਜੋ ਕੋਈ ਗਲਤਫ਼ਹਮੀ ਜਾਂ ਦੁਰਵਿਵਹਾਰ ਨਾ ਹੋਵੇ।
ਇਸ ਫ਼ੈਸਲੇ ਤੋਂ ਬਾਅਦ ਉਮੀਦ ਹੈ ਕਿ ਚੰਡੀਗੜ੍ਹ ਵਿੱਚ ਟ੍ਰੈਫਿਕ ਪ੍ਰਣਾਲੀ ਹੋਰ ਪਾਰਦਰਸ਼ੀ ਅਤੇ ਸੁਚਾਰੂ ਹੋਵੇਗੀ ਅਤੇ ਵਾਹਨ ਚਾਲਕਾਂ ਨੂੰ ਬਿਨਾਂ ਕਾਰਨ ਰੋਕੇ ਜਾਣ ਤੋਂ ਮੁਕਤੀ ਮਿਲੇਗੀ।